বলীউডৰ অভিনেতা ছলমান খান আৰু তেওঁৰ পিতৃ চেলিম খানে লাভ কৰা ভাবুকিপূৰ্ণ পত্ৰৰ ক্ষেত্ৰত গেংষ্টাৰ লৰেন্স বিষ্ণোইৰ ওপৰত পৰিছে সকলোৰে চকু। দিল্লী আৰক্ষীয়ে অভিনেতা ছলমান খানলৈ লিখা ভাবুকিপূৰ্ণ পত্ৰখনৰ তদন্ত তীব্ৰতৰ কৰি তুলিছে আৰু সোমবাৰে কাৰাগাৰত থকা গেংষ্টাৰ লৰেন্স বিষ্ণোইক সোধা-পোছা কৰা হৈছে।
সোধা-পোছাৰ অন্তত তেওঁ কয় যে তেওঁৰ এই বিষয়টোৰ সন্দৰ্ভত কোনো হাত নাই আৰু কোনে পত্ৰখন জাৰী কৰিছে সেয়া নাজানে।
মুম্বাই আৰক্ষীয়ে সোমবাৰে বলীউড অভিনেতা ছলমান খানৰ পিতৃ চেলিম খানৰ ভাষ্য লিপিবদ্ধ কৰিছিল। যি এদিন পূৰ্বে এখন পত্ৰৰ জৰিয়তে ভাবুকি পাইছিল যে পিতৃ-পুত্ৰৰ যুটিৰ ভাগ্য পাঞ্জাৱী গায়ক সিদ্ধু মোচেৱালাৰ দৰেই হ’ব। ইয়াৰ পাছতেই এগৰাকী বিষয়াই বান্দ্ৰাত ছলমান খানৰ ঘৰলৈ গৈ ঘৰৰ চাৰিওফালে নিৰাপত্তা বৃদ্ধি কৰে।
স্থানীয় আৰক্ষীৰ মতে, লৰেন্স বিষ্ণোই দলটো এই ঘটনাৰ লগত জড়িত থাকিব পাৰে, কিন্তু এতিয়া তেওঁ নিজেই জড়িত থকাৰ কথা অস্বীকাৰ কৰিছে। মুম্বাইৰ আৰক্ষী আয়ুক্ত সঞ্জয় পাণ্ডেয়ে কৈছিল যে তেওঁ বলীউড অভিনেতা ছলমান খানৰ দ্বাৰা প্ৰাপ্ত ভাবুকিপূৰ্ণ পত্ৰখন গুৰুত্বসহকাৰে লোৱা হৈছিল। “চিঠিখন ভুৱা নে নহয় সেয়া অতি শীঘ্ৰেই তদন্ত গম পোৱা যাব। কিন্তু আমি লৰেন্স বিষ্ণোই দলৰ বিষয়ে একো ক’ব নোৱাৰো।”
উল্লেখযোগ্য যে অনুসন্ধানকাৰীসকলে দেওবাৰে বান্দ্ৰা বেণ্ডষ্টেণ্ডত ৰাতিপুৱা খোজ কাঢ়ি থকা লগতে বেঞ্চত ভাবুকিপূৰ্ণ পত্ৰ খন ৰখা মানুহজনক চিনাক্ত কৰিবলৈ অঞ্চলটোৰ ২০০ তকৈও অধিক চিচিটিভি কেমেৰাৰ পৰা ফুটেজ সংগ্ৰহ কৰিছে।
