পাকিস্তানত হিন্দু যুৱতীক বলপূৰ্বক ধৰ্ম প্ৰৱৰ্তন। ধৰ্মান্তৰিত কৰোৱাৰ পিছত মুছলমান যুৱকৰে সৈতে কৰোৱা হৈছে বিবাহ । শেহতীয়াকৈ পাকিস্তানৰ সিন্ধুৰ পৰা এটা নতুন খবৰ আহিছে। জানিব পৰা গৈছে যে পাকিস্তানৰ সিন্ধু প্ৰদেশৰ এগৰাকী ১৬ বছৰীয়া কিশোৰীক প্ৰথমে ধৰ্মান্তৰিত কৰা হৈছিল আৰু তাৰ পিছত এজন মুছলমান যুৱকৰ সৈতে বলপূৰ্বক বিবাহ পাশত আৱদ্ধ কৰা হৈছিল। বিয়াৰ পিছৰে পৰা ছোৱালীজনী সন্ধানহীন হৈ আছে ।
এই ঘটনাটোৰ বিৰুদ্ধে প্ৰতিবাদ কৰি ক্ষোভিত ৰাইজে নৱাবশ্বাহত প্ৰাক্তন ৰাষ্ট্ৰপতি আচিফ আলী জাৰদাৰীৰ ঘৰৰ বাহিৰত প্ৰতিবাদ সাব্যস্ত কৰিছে।
পাকিস্তানত এনে ধৰণৰ ঘটনা সচৰাচৰ দেখা যায়। এনে বহুতো ঘটনা ঘটিছে, য’ত হিন্দু ছোৱালীসকলক ধৰ্মান্তৰিত কৰা হয় আৰু মুছলমানসকলৰ সৈতে বিবাহ পাশত আৱদ্ধ কৰা হয়। পাকিস্তানৰ ডন বাতৰি কাকতৰ মতে, ছোৱালীজনী যাৰ নাম শ্ৰীমতী কৰীণা, তেওঁক এসপ্তাহ পূৰ্বেই পাকিস্তানৰ সিন্ধু প্ৰদেশৰ দাদু কাজী আহমেদ চহৰৰ উন্নাৰ মহল্লাৰ পৰা অপহৰণ কৰা হৈছিল।
পাকিস্তানী আৰক্ষীয়ে এনে ক্ষেত্ৰত স্থানীয় মৌলানাসকলৰ হেঁচাত কাম কৰে। সেইকাৰণেই এই ঘটনাবোৰক প্ৰেমৰ সম্পৰ্কৰ সৈতে সংযুক্ত কৰে। পাকিস্তানৰ সিন্ধু প্ৰদেশৰ আৰক্ষীয়ে ঘটনাটোক প্ৰেমৰ সম্পৰ্কৰ সৈতে সম্পৰ্কিত কৰি কয় যে হিন্দু ছোৱালীজনীৰ খলিল ৰেহমান জোনো নামৰ এজন মুছলমান যুৱকৰ সৈতে সম্পৰ্ক আছিল আৰু ছোৱালীজনী তেওঁৰ সৈতে পলাই গৈছিল।
আৰক্ষীয়ে দাবী কৰিছে যে দুয়ো কৰাচীৰ আদালতলৈ গৈছে আৰু বিবাহ পাশত আৱদ্ধ হৈছে। অৱশ্যে, আৰক্ষীয়ে ছোৱালীজনীৰ পৰিয়ালক এই মুহূৰ্তত ছোৱালীজনী ক’ত আছে সেই বিষয়ে ক’ব পৰা নাই।
