উচ্চতম ন্যায়ালয়ে পলাতক ব্যৱসায়ী বিজয় মালিয়াক আদালত অৱমাননাৰ গোচৰত ৪ মাহৰ কাৰাদণ্ড প্ৰদান কৰিছে আৰু ২০০০ টকাৰ জৰিমনা আৰোপ কৰিছে। ন্যায়াধীশ ইউ ইউ ললিত, এছ ৰবীন্দ্ৰ ভট্ট আৰু সুধাংশু ধুলিয়াৰ বিচাৰপীঠে এই ৰায় ঘোষণা কৰিছে। দেশৰ শীৰ্ষ আদালতে পাঁচ বছৰ পূৰ্বে ৯ মে’, ২০১৭ তাৰিখে বিজয় মালিয়াক আদালত অৱমাননাৰ গোচৰত দোষী সাব্যস্ত কৰিছিল। SBI নেতৃত্বাধীন বেংকৰ কনচৰ্টিয়ামে দাখিল কৰা গোচৰত আদালতৰ আদেশ উলংঘা কৰি তেওঁ তেওঁৰ সন্তানলৈ ৪০ নিযুত আমেৰিকান ডলাৰ স্থানান্তৰ কৰাৰ বাবে দোষী সাব্যস্ত কৰা হৈছিল।
উচ্চতম ন্যায়ালয়ত গোচৰটোৰ শুনানিৰ সময়ত বিজয় মালিয়া হাজিৰ হৈছিল কিন্তু তেওঁৰ হৈ কোনো অধিবক্তা অহা নাছিল। কেন্দ্ৰীয় চৰকাৰে উচ্চতম ন্যায়ালয়ক গোচৰটোত বিজয় মালিয়াক সৰ্বাধিক শাস্তি দিবলৈ অনুৰোধ জনাইছিল। কেন্দ্ৰই কৈছিল যে মালিয়াই কেৱল বিদেশী একাউণ্টলৈ ধন স্থানান্তৰ কৰাৰ বিষয়ে আদালতক ভুল তথ্য দিয়াই নহয় যোৱা পাঁচ বছৰ ধৰি আদালতত হাজিৰ হোৱা নাছিল আৰু আদেশবোৰ অৱমাননা কৰিছিল।
বিজয় মালিয়াই ভাৰতীয় বেংকৰ পৰা ৯,০০০ কোটি টকাৰ ঋণ লৈ পলাতক হৈ আছে। উচ্চতম ন্যায়ালয়ে কয় যে বিজয় মালিয়াই অৱমাননাৰ বাবে আদালতৰ সন্মুখত কেতিয়াও ক্ষমা বিচৰা নাছিল। শীৰ্ষ আদালতে পলাতক ব্যৱসায়ীজনক চাৰি সপ্তাহৰ ভিতৰত সূতৰ সৈতে ৪০ নিযুত আমেৰিকান ডলাৰ ঘূৰাই দিবলৈ কৈছে। এয়া কৰিবলৈ ব্যৰ্থ হ’লে বিজয় মালিয়াৰ সম্পত্তি সংলগ্ন কৰা হ’ব। কেন্দ্ৰীয় অনুসন্ধানকাৰী সংস্থাসমূহৰ বিষয়াসকলে ব্যৱস্থা ল’ব।
ইয়াৰ পূৰ্বে, কেন্দ্ৰীয় চৰকাৰে উচ্চতম ন্যায়ালয়ক কৈছিল যে প্ৰত্যৰ্পণৰ বাবে আইনী যুঁজত পৰাজিত হোৱা স্বত্বেও বিজয় মালিয়াই কিছু আইনী কৌশল গ্ৰহণ কৰি UKত বাস কৰি আছে। তেওঁ তাত এটা গোপন আইনী প্ৰক্ৰিয়া আৰম্ভ কৰিছে। UK চৰকাৰে ভাৰত চৰকাৰক এই প্ৰক্ৰিয়াটোৰ তথ্য ভাগ বতৰা কৰা নাই। ইয়াৰ বাবে মালিয়াক এতিয়ালৈকে ভাৰতলৈ অনা হোৱা নাই। শীৰ্ষ ন্যায়ালয়ে শুনানিৰ সময়ত কৈছিল যে মালিয়াই UKত এজন মুক্ত মানুহৰ দৰে বাস কৰে, কিন্তু তেওঁ তাত কি কৰি আছে সেই বিষয়ে কোনো তথ্য নাই।
