চৰকাৰৰ পলিচী থিংক টেংক নীতি আয়োগে পৰামৰ্শ দিছে যে দেশৰ গিগ কৰ্মচাৰীৰ বাবে সবেতন ছুটি, বৃত্তিগত ৰোগ আৰু কৰ্ম দুৰ্ঘটনা বীমা, কামৰ অনিয়মৰ সময়ত সমৰ্থন আৰু পেঞ্চন আঁচনিসহ সামাজিক সুৰক্ষা প্ৰদানৰ বাবে ব্যৱস্থা গ্ৰহণ কৰিব লাগে, যি ২০২৯-৩০ চনলৈ ২.৩৫ কোটিলৈ বৃদ্ধি হোৱাৰ সম্ভাৱনা আছে। এজন স্বতন্ত্ৰ ঠিকাদাৰ বা ফ্ৰিলাঞ্চাৰ হিচাপে সেৱা খণ্ডত অস্থায়ী চাকৰি থকা ব্যক্তিএজনক গিগ কৰ্মী বুলি কোৱা হয়।
নীতি আয়োগে প্ৰকাশ কৰা অধ্যয়ন অনুসৰি, ২০২০-২১ বৰ্ষত গিগ অৰ্থনীতিত নিয়োজিত শ্ৰমিকৰ সংখ্যা ৭৭ লাখ হ’ব বুলি অনুমান কৰা হৈছে। “ভাৰতক এক পৰিকাঠামোৰৰ প্ৰয়োজন, যিয়ে মঞ্চৰ দ্বাৰা আগবঢ়োৱা নমনীয়তাৰ ভাৰসাম্য বজাই ৰাখে আৰু লগতে শ্ৰমিকসকলৰ সামাজিক সুৰক্ষা নিশ্চিত কৰে। ইয়াৰ ফলস্বৰূপে কামৰ মঞ্চায়নে শ্ৰমিকৰ এক নতুন শ্ৰেণী বিভাজনৰ জন্ম দিছে । প্লেটফৰ্ম শ্ৰমিক যি আনুষ্ঠানিক আৰু অনানুষ্ঠানিক শ্ৰমিকৰ পৰম্পৰাগত বিভাজনৰ আওতাৰ বাহিৰত পৰিছে,” অধ্যয়নটোত এনেদৰে কোৱা হৈছে। প্ৰতিবেদনত উল্লেখ কৰা হৈছে যে বৰ্তমান প্ৰায় ৪৭% গিগ কাম মধ্যমীয়া দক্ষ চাকৰিত, প্ৰায় ২২% উচ্চ দক্ষ আৰু নিম্ন দক্ষ চাকৰিত প্ৰায় ৩১% নিয়োগ হৈ আছে আৰু এই প্ৰৱণতাই দেখুৱায় যে মধ্যমীয়া দক্ষতাত শ্ৰমিকৰ ঘনত্ব ক্ৰমান্বয়ে হ্ৰাস পাইছে আৰু নিম্ন দক্ষ আৰু উচ্চ দক্ষৰ কাম বৃদ্ধি পাইছে। যদিও মধ্যমীয়া দক্ষতাৰ আধিপত্য ২০৩০ চনলৈকে অব্যাহত থাকিব, আন দক্ষতাৰ সৈতে গিগ কাম উদ্ভৱ হ’ব।
যদিও ২০২০-২১ বৰ্ষত, গিগ কৰ্মশক্তি অনা-কৃষি কৰ্মশক্তিৰ ২.৬ % বা ভাৰতৰ মুঠ কৰ্মশক্তিৰ ১.৫ % আছিল, ২০২৯-৩০ চনলৈ, গিগ শ্ৰমিকসকলে অনা-কৃষি কৰ্মশক্তিৰ ৬.৭% বা ভাৰতত মুঠ জীৱিকা কৰ্মশক্তিৰ ৪.১% গঠন কৰিব বুলি আশা কৰা হৈছে। অধ্যয়নটোত উল্লেখ কৰা হৈছে এনেদৰে।থিংক টেংকটোৱে ‘ষ্টাৰ্টআপ ইণ্ডিয়া উদ্যোগ’ৰ আৰ্হিত এক ‘প্লেটফৰ্ম ইণ্ডিয়া উদ্যোগ’ আৰম্ভ কৰাৰ পৰামৰ্শ দিছে, যি সৰলীকৰণ আৰু হস্তান্তৰ, পুঁজি সমৰ্থন আৰু উদগনি, দক্ষতা বিকাশ আৰু সামাজিক বিত্তীয় অন্তৰ্ভুক্তিৰ দ্বাৰা প্লেটফৰ্মিজেচন ত্বৰান্বিত কৰাৰ স্তম্ভৰ ওপৰত নিৰ্মিত। ই পৰামৰ্শ দিছে যে আঞ্চলিক আৰু গ্ৰাম্য ৰন্ধন প্ৰণালী, পথৰ খাদ্য আদি বিক্ৰী কৰাৰ ব্যৱসায়ত নিয়োজিত স্ব-নিয়োজিত ব্যক্তিসকলকো প্লেটফৰ্মৰ সৈতে সংযুক্ত কৰা হ’ব পাৰে যাতে তেওঁলোকে তেওঁলোকৰ উৎপাদিত সামগ্ৰী চহৰ আৰু চহৰৰ বহল বজাৰত বিক্ৰী কৰিব পাৰে।
“বিশেষকৈ প্লেটফৰ্ম কৰ্মী আৰু তেওঁলোকৰ নিজা প্লেটফৰ্ম স্থাপন কৰিবলৈ আগ্ৰহী সকলৰ বাবে প্ৰস্তুত কৰা বিত্তীয় সামগ্ৰীৰ জৰিয়তে প্ৰতিষ্ঠানগত ঋণৰ প্ৰৱেশাধিকাৰ বৃদ্ধি কৰা হ’ব পাৰে। প্ৰাক-ৰাজহ আৰু প্ৰাৰম্ভিক ৰাজহ পৰ্যায়ত সকলো আকাৰৰ প্লেটফৰ্ম ব্যৱসায়ক বেংক আৰু অন্যান্য পুঁজি সংস্থাৰ পৰা ভেঞ্চাৰ কেপিটেল ফাণ্ডিং, অনুদান আৰু ঋণ প্ৰদান কৰিব লাগে,” এনেদৰে পৰামৰ্শও প্ৰদান কৰা হৈছে।
অন্যান্য পৰামৰ্শবোৰৰ ভিতৰত আছে শ্ৰমিক আৰু তেওঁলোকৰ পৰিয়ালৰ বাবে লিংগ সংবেদনশীলতা আৰু অভিগম্যতা সজাগতা কাৰ্যসূচী, ভাৰতত গিগ আৰু প্লেটফৰ্ম কৰ্মীসকলৰ বাবে সামাজিক সুৰক্ষা সম্প্ৰসাৰিত কৰা, আৰু প্লেটফৰ্ম অৰ্থনীতিৰ মুখ্য দিশবোৰৰ ওপৰত অধ্যয়ন কৰা।
